| Polo seu interese, publicamos a entrevista
publicada o 13 de novembro no xornal dixital galego
GZNACION.
 Como
xurde Espazo Socialista Galego?
A idea xurde polo 10 de maio cando un grupo de homes
e mulleres do BNG, partindo de diferentes experiencias
políticas, constatamos que o espazo político
do socialismo democrático non ten o cauce axeitado
para a súa expresión. Nese intre decidimos
artellarnos organizadamente e a resultante final foi
xerar un proceso que se deu en chamar Espazo Aberto
e que finalmente concluíu coa xeración
dun partido político, Espazo Socialista Galego.
Como se define Espazo Socialista Galego?
Como todo corpo ideolóxico hai unha diversidade
de matices que é difícil resumir, pero
poderíamos dicir que, aténdonos ao nome,
somos un ‘espazo’, porque, a pesares de
sermos un partido e estar estruturados como tal, entendemos
que ten que haber unha estrutura horizontal da organización
na que exista unha correlación e unha corresponsabilidade
entre o conxunto da militancia. Ten que haber unha reciprocidade
entre a dirección e a militancia.
Somos ‘socialistas’ porque acreditamos en
principios como a redistribución das riquezas,
a igualdade de oportunidades, a participación
dos poderes públicos no funcionamento da economía,
e entendemos que a prestación de servizos sociais
e a xeración do Estado do Benestar debe ser un
servizo básico e non un privilexio. E logo, evidentemente
tamén somos galegos e somos nacionalistas, e
como tal defendemos para o noso pais a máis elevada
cota competencial que pode reclamar calquera nacionalista.
Que vai achegar Espazo Socialista ao BNG?
Un novo xeito de pensar e un novo xeito de facer
política. Entendemos que as forzas políticas
que están non interior do BNG deben centrarse
máis na cuestión ideolóxica e tentar
impregnar a acción colectiva do BNG da súa
forma de ver a política. E iso é unha
das cousas que nós imos tentar facer. E importante
que cada colectivo e cada partido político teña
os seus referentes, máis o verdadeiramente importante,
o que caracteriza a un partido dentro do BNG, é
a súa expresión e a súa forma de
pensar. Iso é algo no que imos poñer o
acento.
Acabades de nacer, cales son os retos que tedes fixado
a curto prazo?
Dunha forma inmediata, o noso obxectivo é
dotarnos dun tecido territorial máis amplo do
que temos agora mesmo. Dar a coñecer o noso proxecto
ao conxunto de homes e mulleres do BNG. Pretendemos,
tamén, servir de porta de achega e de entrada
á xente que aínda non participa no BNG
e en definitiva traballar no que poden ser os vimbios
dunha organización política tenaz.
Resaltabades na presentación a importancia que
vai ter a mocidade para Espazo Socialista Galego. En
que aspectos ser vai a reflectir?
O da mocidade é importante porque, para ben
ou para mal, a nosa e unha organización cunha
media de idade máis baixa que a maioría
de formacións. Isto significa que a nosa xente
moza ten que madurar politicamente moito máis
rápido do que adoita acontecer en outras forzas
e ademais terán que asumir responsabilidades
dentro do partido. Pero estamos certos de que a nosa
mocidade esta preparada para isto e para moito máis.
Este é un proxecto que evidentemente non ten
unha data de caducidade senón que ten unha visión
e unha proxección a moi longo prazo, o que implica
tamén pensar nunha organización de futuro,
non só de presente.
Como foi acollido ESG por parte do resto de partidos
que conforman o BNG?
Penso que positivamente. O BNG é un sitio
de encontro para todos os nacionalistas de ben e a impresión
que teño é que fomos perfectamente acollidos.
A presenza de Alberto Ansede en representación
do BNG, no acto de presentación, para nós
foi moi importante e de igual xeito o calor que nos
transmitiron os compañeiros doutros grupos alí
presentes. Penso que fomos ben acollidos. Ninguén
me fixo chegar en ningún momento ningún
tipo de preocupación nin resquemor. Todo o contrario,
todo foron parabéns e felicitacións.
E en canto ao panorama político de Galiza, como
ves ao BNG de cara as vindeiras eleccións?
Penso que vai a saír claramente reforzado.
Nós temos un compromiso coa cidadanía
aplicamos unha política que ten a súa
orixe en escoitar cales son os problemas dos cidadáns
e en intentar satisfacer as súas demandas. Estamos
actuando en base a que a mellora no benestar do cidadán
está bencellada á cuestión nacional
e canto máis autogoberno haxa mellor vivirá
a nosa cidadanía. Estamos presentando alternativas
para paliar os problemas derivados da crise económica.
Eu creo que de todo isto o cidadán consciente
vai tomar boa nota e que se notará nas eleccións.
|
Após
varios meses de traballo interno e externo e debate,
o 8 de novembro de 2008 celébrase en Compostela
a Asemblea Nacional Constituínte do ESPAZO SOCIALISTA
GALEGO (ESG), a nova organización política
que nace no seo do BNG como xestación do proceso
Espazo Aberto.
1.
XOÁN CARLOS BARCUAS JARDÓN.
